Flota ruse e Detit të Zi është detyruar të zhvendosë pothuajse të gjitha anijet e saj luftarake të gatshme nga Krimea e aneksuar duke i ripozicionuar në vende të tjera dhe qendra e saj kryesore detare po bëhet e paefektshme për shkak të sulmeve nga Kievi, tha shefi i marinës së Ukrainës. Zëvendës-admirali Oleksiy Neizhpapa tha se sulmet me raketa dhe dronë detarë ukrainas kishin shkaktuar dëme të rënda në bazën e Sevastopolit, një qendër logjistike për riparime, mirëmbajtje, trajnime dhe ruajtje të municioneve. “Kjo bazë është ndërtuar ndër dekada. Dhe është e qartë se tani rusët po e humbasin atë", tha Neizhpapa për Reuters në një intervistë të rrallë në qytetin port të Odesës, përpara Ditës së Marinës së Ukrainës, që shënohet të dielën. Kur kanë kaluar më shumë se 28 muaj që nga fillimi i pushtimit rus të Ukrainës, Kievi i ka dhënë një sërë goditjesh therëse Moskës në Detin e Zi, megjithëse trupat tokësore ukrainase janë në vështirësi në një vijë të gjatë fronti. Ukraina, e cila nuk ka asnjë anije të madhe luftarake në dispozicion, ka përdorur mjete detare të telekomanduara, të mbushura me eksplozivë për të shënjestruar anijet ruse dhe ka goditur po ashtu objektet e flotës dhe shënjestra të tjera ushtarake në Krime me raketa Storm Shadoë dhe ATACM. "Pothuajse të gjitha anijet kryesore të gatshme luftarake janë zhvendosur nga armiku nga baza kryesore e flotës së Detit të Zi, dhe po mbahen në Novorossiisk dhe disa prej tyre mbahen edhe në Detin Azov," tha shefi i marinës së kievit. Bazës detare të Rusisë në Novorossiisk në bregun lindor të Detit të Zi i mungojnë objektet e gjera të Sevastopolit të Krimesë, që ka shërbyer si vend depozitimi dhe ngarkimi për raketat e lundrimit të përdorura nga luftanijet ruse për të nisur sulmet ajrore në Ukrainë. "Tani ata po përpiqen ta zgjidhin këtë problem në Novorossiisk," tha Neizhpapa, duke e përshkruar këtë si një "problem madhor " për flotën.