Dy ish-komandantë të lartë të ushtrisë amerikane thonë se mburoja ajrore e Evropës nuk është e përgatitur që të përballet me shkallën e kërcënimit nga Rusia, ndërkaq kreu i task-forcës për mbrojtje ajrore dhe raketore në Marinën amerikane i tha Radios Evropa e Lirë se pengimi i sulmeve “është gjithmonë si raporti mes maces me miun”. Këto deklarata vijnë në kohën kur vendet evropiane po nisin një program masiv riarmatimi, i miratuar muajin e kaluar, ku mbrojtja ajrore është në krye të listës së prioriteteve. “Shikoni çfarë ka ndodhur në qytetet e mëdha të Ukrainës. E njëjta gjë mund të ndodhë edhe në disa nga qytetet e mëdha të Evropës”, tha Philip Breedlove, ish-komandanti suprem i NATO-s në Evropë. “Nëse jeni ulur diku dhe mendoni se jeni nën një mburojë magjike si në programet televizive, nuk është vend i mirë për të qenë”, shtoi ai.