Vendet anëtare të NATO-s ranë dakord për përmbajtjen e deklaratës përfundimtare të samitit të zhvilluar në Hagë, ku dominoi kërkesa për rritjen e shpenzimeve ushtarake me 5 për qind, Ukraina dhe neni 5 i traktatit të aleancës. Sa u takon shpenzimeve, udhëheqësit e vendeve anëtare të aleancës u zotuan të rrisin shpenzimet e mbrojtjes në nivelin e propozuar nga Shtetet e Bashkuara të Amerikës. Zotimi është pjesë e Deklaratës përfundimtare të Samitit të Hagës, që u miratua unanimisht nga 32 vendet anëtare të Aleancës, përfshirë edhe Spanjën, që ishte kundërshtarja më e madhe e kësaj pike. Nën dritën e mëdyshjes së angazhimit amerikan për mbrojtjen e Europës, diskutimet u përqëndruan edhe te neni 5 i traktatit, që lidhet me mbrojtjen kolektive. Sipas këtij neni, sulmi ndaj një vendi anëtar të aleancës konsiderohet si sulm ndaj të gjitha vendeve të NATO-s. Këtë nen e vendosi në pikëpyetje Donald Trump, por që u tërhoq nga ky qëndrim me të zbritur në Hagë, duke theksuar se angazhimi mbrojtës amerikan në Europë nuk ndryshon. Në deklaratë ritheksohet mbështetja për Ukrainën dhe Rusia vlerësohet si kërcënim afatgjatë për Perëndimin. Në këtë samit mori pjesë edhe Kryeministri Edi Rama, që zhvilloi disa takime, përfshirë këtu edhe me Sekretarin e Përgjithshëm të NATO-s, Mark Rutte.