Në tetor të këtij viti, nëntë ushtarë të kapur ukrainas thuhet se u qëlluan për vdekje nga forcat ruse në rajonin e Kurskut. Prokurorët ukrainas po hetojnë rastin duke përfshirë një foto që tregon trupa gjysmë të zhveshur të shtrirë në tokë. Ka mjaftuar kjo foto që një nga viktimat, operatori i dronëve Ruslan Holubenko, të identifikohej nga prindërit e tij. "Unë e njoha atë nga rrobat," i tha nëna e tij e shqetësuar transmetuesit lokal Suspilne Chernihiv. "Unë ia bleva para një udhëtimi”. Lista e ekzekutimeve vazhdon. Prokurorët ukrainas po hetojnë raporte për prerje koke si edhe për vrasjen e një ushtari ukrainas me duart e lidhura pas shpine. Në një rast tjetër, një video tregoi 16 ushtarë ukrainas të rreshtuar që më pas pushkatoheshin. Ata shiheshin të dilnin nga një pyll për t'u dorëzuar. Disa nga ekzekutimet janë filmuar nga vetë forcat ruse, ndërsa të tjera janë fiksuar nga dronët ukrainas që fluturonin sipër. Vrasjet e fiksuara në video të tilla zakonisht ndodhin në pyje ose fusha pa tipare dalluese, gjë që e bën të vështirë konfirmimin e vendndodhjes së tyre të saktë. BBC, megjithatë, ka qenë në gjendje të konfirmojë në disa raste se viktimat mbajnë uniforma ukrainase dhe se videot janë të kohëve të fundit. Prokuroria ukrainase thotë se të paktën 147 të burgosur ukrainas të luftës janë ekzekutuar nga forcat ruse që nga fillimi i pushtimit në shkallë të gjerë, 127 prej tyre vetëm këtë vit. "Tendenca në rritje është shumë e qartë, shumë e dukshme," thotë Yuri Belousov, kreu i Departamentit të Luftës në Zyrën e Prokurorit të Përgjithshëm të Ukrainës. Sipas tij, ekzekutimet janë bërë sistematike që nga nëntori i vitit të kaluar dhe kanë vazhduar gjatë gjithë këtij viti. E drejta ndërkombëtare humanitare, veçanërisht Konventa e Tretë e Gjenevës, ofron mbrojtje për të burgosurit e luftës dhe ekzekutimi i tyre është një krim lufte. Pavarësisht kësaj, Ramzan Kadyrov, lideri i fortë i Çeçenisë, urdhëroi prerazi komandantët e tij që luftojnë në Ukrainë "të mos marrin robër".