Trupat turke dhe ato ruse i kanë nisur patrullimet e përbashkëta tokësore me autoblinda në verilindje të Sirisë, njoftoi Ministria e Mbrojtjes e Turqisë të premten. Patrullimet e tyre të përbashkëta në këtë rajon u ndërprenë vitin e kaluar, për shkaqe sigurie, sipas Ministrisë turke. Patrullimi i përbashkët rifilloi të enjten në verilindje të Sirisë dhe në të u përfshinë katër automjete dhe 24 ushtarë, sipas njoftimit. Ministria turke nuk dha shpjegime në lidhje me çështjet e sigurisë që shkaktuan ndërprerjen e patrullimeve të përbashkëta në tetor të vitit të kaluar. Ajo tha se 344 patrullime të përbashkëta janë kryer në atë zonë prej vitit 2019. Më 2019, Turqia dhe aleatët e saj rebelë sirianë, i nisën operacionet ushtarake në verilindje të Turqisë, të quajtura “Operacioni Paqja Pranverore”, me qëllim për t’i zmbrapsur Forcat Demokratike Siriane të udhëhequra nga kurdët.