Ministria e Jashtme e Ukrainës ka reaguar pas deklaratës së presidentit rus Vladimir Putin, i cili tha se Rusia ka rënë dakord me Bjellorusinë, që të vendosë armë bërthamore taktike në vendin fqinj. Ministria e Punëve të Jashtme të Ukrainës shprehet se vendosja e armëve bërthamore taktike në Bjellorusi është një shkelje e Traktatit për Mospërhapjen e Armëve Bërthamore. Në deklaratë thuhet se Ukraina i bën thirrje Bjellorusisë që të parandalojë zbatimin e synimeve kriminale në lidhje me vendosjen e armëve bërthamore brenda territorit të Bjellorusisë, e cila do ta shndërrojë këtë vend në peng të Kremlinit dhe do të ketë pasoja katastrofike për të ardhmen e tij. “Ukraina pret veprime efektive për të kundërshtuar shantazhin bërthamor të Kremlinit nga Mbretëria e Bashkuar, Kina, Shtetet e Bashkuara dhe Franca, veçanërisht si anëtarë të përhershëm të Këshillit të Sigurimit të OKB-së, të cilët kanë një përgjegjësi të veçantë për parandalimin e kërcënimeve të agresionit me përdorimin e armëve bërthamore. Kërkojmë që menjëherë të thirret një mbledhje e jashtëzakonshme e Këshillit të Sigurimit të OKB-së për këtë qëllim”, deklaron ministia. Deri me tani Rusia ka vendosur në Bjellorusi 10 avionë të aftë për të mbajtur armë bërthamore taktike. Shefi i Kremlinit njoftoi se ndërtimi i një depoje për armë bërthamore në Bjellorusi do të përfundojë më 1 korrik, por nuk specifikoi se kur do të bëhet transferimi i armëve.