Rusia dhe Uzbekistani e kanë nënshkruar një marrëveshje, sipas të cilës, Moska do ta ndërtojë një central të vogël bërthamor në vendin e Azisë Qendrore. Kjo ishte një prej disa marrëveshjeve të nënshkruara të hënën në Tashkent mes presidentit rus, Vladimir Putin, dhe homologut të tij uzbek, Shavkat Mirziyoev. Lideri uzbek e lartësoi projektin duke e quajtur atë “jetik” në një komunikatë të publikuar pas bisedimeve me Putinin, ku u theksua se Uzbekistani ka “rezervat e veta të mëdha të uraniumit”. Ndërkohë, Putin premtoi se do të bëjë “gjithçka për të punuar në mënyrë efikase” për tregun e energjisë bërthamore të Uzbekistanit. Nëse kjo marrëveshje miratohet, centrali bërthamor do të jetë i pari në Azinë Qendrore, dhe do ta thellojë edhe më shumë ndikimin rus në rajon. Putini theksoi se Rusia do të derdhë 400 milionë dollarë në një fond të përbashkët investimi për të financuar projektet në Uzbekistan. Mirziyoev tha gjithashtu se Tashkenti është i interesuar të blejë më shumë naftë dhe gaz nga Rusia. Presidenti rus në anën tjetër premtoi se rusia do të rrisë dërgesat e gazit për në Uzbekistan. Putin dhe Mirziyoev biseduan edhe për emigrimin, me liderin rus që e siguroi presidentin uzbek se qeveria e tij do të garantojë kushte të mira pune dhe do të ofrojë mbrojtje sociale për punëtorët emigrantë nga Uzbekistani. Putini mbërriti në Tashkent të dielën në mbrëmje dhe u mirëprit nga Mirziyoev në aeroport. Hetimet ndërkombëtare kanë zbuluar ndërkohë se Uzbekistani është një nga pikat kryesore prej nga ky hyjnë në rusi mallrat e sanksionuara.