Rusia ka vënë veton ndaj një rezolute në Këshillin e Sigurimit të OKB-së që u bën thirrje të gjitha vendeve të parandalojnë një garë armatimi në hapësirë. Projekt-rezoluta, e paraqitur nga SHBA-ja dhe Japonia, synonte të riafirmonte një parim të përcaktuar tashmë në Traktatin e Hapësirës së Jashtme të vitit 1967. SHBA-ja ka paralajmëruar se Rusia besohet se po zhvillon një armë bërthamore kundër satelitëve të vendosur në hapësirë. Drafti, i paraqitur të mërkurën, u bëri thirrje "të gjitha shteteve, veçanërisht atyre me aftësi të mëdha hapësinore, të kontribuojnë aktivisht në objektivin e përdorimit paqësor të hapësirës dhe parandalimin e një gare armatimesh në hapësirën e jashtme". Ai gjithashtu u bëri thirrje vendeve që të mbështesin Traktatin e Hapësirës së Jashtme, sipas të cilit të gjitha palët kanë rënë dakord "të mos vendosin në orbitën rreth Tokës asnjë objekt që mban armë bërthamore ose ndonjë lloj tjetër arme të shkatërrimit në masë".