Edhe pse ka qënë prej vitesh një parajsë për jahtet, turistët dhe oligarkët nga Rusia, Mali i Zi përballet me një të ardhme të pasigurt. Fluksi i parave të pista nga Moska është ndalur dhe tani vendi fqinj është zotuar të ndjekë Bashkimin Europian në hakmarrjen ndaj Moskës. Pas pushtimit të Ukrainës nga presidenti rus Vladimir Putin në shkurt, Mali i Zi e ka gjetur veten përballë një nyjeje gordiane, pasi sanksionet kërcënojnë të përmbysin ekonominë e vendit. Çdo goditje mund të jetë e tmerrshme në vendin fqinj, sepse një e katërta e ekonomisë është e lidhur me sektorin turistik, që varet nga rusët për më shumë se një dekadë. Përgjatë shëtitores kryesore në Budva, rusishtja shpesh dëgjohet edhe më shumë se serbishtja dhe vija bregdetare e Malit të Zi është e mbushur me vilat dhe resortet në pronësi të oligarkëvë rusë. Pushtimi i Ukrainës, i ndjekur me shpejtësi nga një sërë sanksionesh perëndimore ndaj institucioneve financiare ruse dhe ndalimet e fluturimeve nëpër Evropë, ka ngjallur frikën e pasojave negative për Malin e Zi.