Shoqata Kombëtare e Ndërmjetësve të Pasurive të Paluajtshme i kërkon Presidentit të Republikës që të dekretojë pa vonesa ligjin e miratuar më 12 dhjetor nga Kuvendi për rivlerësimin e banesave me tatim 5 për qind. Në një letër publike, shoqata thotë se vonesa e miratimit të këtij ligji po mban pezull tregun prej 18 muajsh tashmë dhe ka krijuar presione inflacioniste. Shoqata thotë se janë 500 mijë familje shqiptare që presin të rivlerësojnë pasurinë e tyre në vlerën e tregut si dhe dhjetëra mijëra familje të tjera që shpresojnë për një alternativë strehimi të përballueshëm. Shoqata thekson se norma e tatimit prej 5 për qind është e lartë, teksa vë në pikëpyetje edhe zbatueshmërinë e uljes së kësaj takse me 1 për qind për çdo vit vjetërsie banese. Qeveria planifikon që ligji të nisë zbatimin nga 1 janari, por mosdekretimi nga Presidenca ka vonuar botimin e tij në Fletoren Zyrtare.