Kryesocialisti Edi Rama udhëzoi grupin parlamentar socialist që të vijojë me punën për riorganizimin e Kuvendit, ku një propozim i hedhur në komisionin e posaçëm të reformave, drejtuar nga Fatmir Xhafaj është edhe ai i një Kuvendi me dy dhoma. Aspektin e ndryshimeve brenda për brenda pushtetit, organizmit po themi të pushtetit legjislativ, që e filluam me komisionet, sot patjetër që qoftë nga kryetarët e komisioneve, qoftë nga anëtarët e interesuar për të diskutuar do dëgjojmë se çfarë opinioni keni lidhur me këtë formulë të re që kemi me numrin e komisioneve, ndarjen dhe duhet ta vazhdojmë me administratën e Kuvendit, e cila kemi kohë që themi duhet të modernizohet dhe duhet të mbështet nga një transformim i rëndësishëm teknologjik, punë për të cilën me siguri do të flasë kryetari dhe nga ana tjetër duhet sigurisht që të vendosim edhe piketat me një kalendar të qartë për godinën e re të Parlamentit të Shqipërisë. Rama u la porosi deputetëve edhe ligjet e integrimit, të cilat sipas tij, nuk duhet të diskutohen nga deputetët, por vetëm të miratohen.