Aksioni “Bregdeti ynë” është rikthyer në Shëngjin e Velipojë ku janë planifikuar të shemben 92 ndërtime pa leje. Në të gjithë vijën bregdetare duke filluar nga Ksamili e deri në Kavajë janë verifikuar 460 objekte pa leje, nga të cilat 340 janë shembur. Forcat e inspektimit janë vendosur në Shëngjin, Tale, Rana e hedhun e deri në Velipojë. Bëhet fjalë për 92 objekte të cilat në verifikimin paraprak rezultojnë pa dokumentacionin përkatës. Gjithashtu në sitën e IKMT do të kalojë dhe bregdeti i Shëngjjinit e ai i Velipojës. Nga 92 objekte të cilat janë në total për tu shembur, 42 prej tyre janë në Velipojë. Nuk dihet ende se kur do të nisë aksioni në Shëngjin e Velipojë. Kujtojmë se pak ditë më parë Ministri i Brendshëm Blendi Çuçi , në një takim me drejtuesit e IKMT, tha se do të shemben të gjitha objektet që për arsye të ndryshme nuk janë legalizuar. Në këtë listë janë dhe ato të cilat janë ndërtuar përgjatë akseve rrugore e nuk respektojnë kriteret ligjore.