Rezultati i zgjedhjeve të pjesshme vendore në Kukës tregon që skandali seksual i Safet Gjicit nuk prodhoi asnjë kosto politike për Partinë Socialiste, përkundrazi. Sipas rezultatit paraprak të Komisionit Qendror të Zgjedhjeve, socialisti Albert Halilaj fiton bashkinë me të paktën 60 për qind të votave. Safet Gjici u rizgjodh në 14 maj me 49.7 për qind të tyre. Në 14 maj, për kryetar ishin tre emra. Gjici kishte përballë Admir Sinamatin e Bashkë Fitojmë të koalicionit Meta-Berisha dhe Abdin Oruçin të Partisë për Europianizimin dhe Integrimin e Shqipërisë. Halilaj pati përballë vetëm kandidatin e Bashkë Fitojmë, Emri Vata. Rezultati tregon, që pjesëmarrja ishte rreth 7 për qind më e ulët se në zgjedhjet e 14 majit. Kjo do të thotë se opozita dështoi që të tërheqë në kutinë e votimit elektoratin gri, apo ata që në zgjedhjet e kaluara votuan për kandidatin Abedin Oruçi.