Dita e dielë do ta gjejë vendin, sërish nën dominimin e masave ajrore të paqëndrueshme, ku vranësirat dhe shirat do të jenë prezent pothuajse gjatë gjithë 24–orëshit. Situata do të jetë më problematike në veriperëndim dhe jugperëndim, duke bërë që rrebeshet të shoqërohen me stuhi te forta ere dhe shkarkesa elektrike. Gjithashtu parashikohet që shirat të mbetën prezent deri në orët e vona të mbrëmjes, ndërsa pritet të ketë herë pas here edhe ndërprerje të reshjeve. Sipas MeteoAlb, temperaturat e ajrit do të rriten në mëngjes, por mesdita pritet të sjellë një rënie të lehtë të tyre duke luhatur vlerat ditore nga 7°C deri në 19°C. Era do të fryjë mesatarisht me shpejtësi 50 km/h nga drejtimi kryesisht Veriperëndimor duke krijuar në brigjet detare dallgëzim 4 ballë. Më herët, sinoptikania Lajda Porja paralajmëroi se reshjet do të jenë të pranishme deri në mesin e javës që vjen. Sipas saj, pritet të ketë mesatarisht 2-fishin e reshjeve që duhet të bien, ku reshjet më të dendura do të jenë në zonat veriore duke ndryshuar në mënyrë të menjëhershme dhe situatën në kaskada nga prurjet.