Megjithëse ekonomia shqiptare po rigjallërohet pas situatës që krijoi koronavirusi në vend, përditësimi më i fundit i Fondit Monetar Ndërkombëtar për treguesin e prodhimit të brendshëm për frymë ose i njohur ndryshe si GDP per capita tregon se mirëqënia e qytetarëve të Shqipërisë krahasuar me vendet e rajonit vijon të ngelet e ulët. Prodhimi i brendshëm për frymë, llogaritet duke pjesëtuar prodhimin e brendshëm bruto me numrin e popullsisë. Në këtë mënyrë llogaritet se ç’pjesë nga prodhimi i brendshëm bruto i takon çdo qytetari. GDP per capita konsiderohet matës i mirëqënies së qytetarëve. Megjithatë edhe kjo formë llogaritjeje nuk është plotësisht e saktë, pasi në çdo shtet ka një shpërndarje të pabarabartë të ardhurash. Në Shqipëri, sipas Fondit Monetar Ndërkombëtar, për vitin 2020 ky tregues ishte 14.2 mijë dollar për frymë , shifër që është 5.5 për qind më e ulët se Bosnjë dhe Hercegovina dhe 32 deri në 33 për qind më e ulët sesa në Serbi dhe Mal të Zi, që janë dy shtetet e rajonit me më shumë të ardhura për frymë. Edhe në krahasim me Maqedoninë e Veriut, ky tregues është 30 për qind më i ulët. Në botë Shqipëria renditet e 90 duke lënë pas Armeninë, Ukrainën dhe Moldavinë, ndërkohë Kosova është më e varfra në Europë me 11.2 mijë dollar amerikanë për frymë. Krahasuar me vitin 2013 Shqipëria ka vijuar në trend rritës. Kujtojmë se në vitin 2013 Shqipëria arriti nivelin më të ulët të rritjes ekonomike, me vetëm 0.8 për qind rritje ekonomikë në vit. Shkak mund të ketë qenë edhe taksa e sheshtë prej 10 për qind e cila u implementuar në vitin 2008.