Kryeministri Edi Rama, I konsideron të pavërteta e fyese, deklaratat e liderit të partisë Reform UK, Nigel Farage, për shqiptarët. Në një intervistë në radion britanike, Times Radio, Rama e konsideroi si marrëzi pretendimin e Farage, se një në çdo 50 shqiptarë në Britani, ndodhet në burg. Sipas tij, këto janë deklarata populiste, nëpërmjet të cilave Britania doli edhe nga Bashkimi Europian. “Nuk ka një numër të lartë të shqiptarëve të dënuar në Mbretërinë e Bashkuar që të veçohen nga totali i të burgosurve apo nga shtetasit e vendeve të tjera. Këto janë pjesë të një mozaiku më të gjerë gënjeshtrash dhe argumentesh mashtruese që iu servirën qytetarëve britanikë për t’i bindur të dalin nga Bashkimi Evropian”, u shpreh Rama. Ndërkohë kryeministri theksoi se nëse nuk do të ishin ishin shqiptarët, shumë sektorë të Britanisë së Madhe do të hasnin vështirësi për tu mbuluar. “Ku do t’i gjeni njerëzit për të ndërtuar shtëpitë tuaja, për t’ju shërbyer kafen, për të drejtuar taksitë dhe kamionët tuaj”, shtoi Kryeministri i Shqipërisë, teksa e ftoi Farage të vizitojë vendin tone. Sipas Ramës, Farage nëse vjen për vizitë mund ta bindë për ta zgjedhur vendin tone si destinacion për pushimet e tij. “Është një mundësi e mirë për të njohur nga afër një njeri me shumë talent e inteligjencë, pavarësisht nga teatraliteti i tij politik, dhe për t’i treguar bukuritë e Shqipërisë.” tha ndër të tjera numri një I qeverisë.