Rama: “Një hapjeje kapilare ndaj njerëzve jashtë rrethit të familjes sonë të madhe, është misioni ynë. Duke filluar nga demokratët, komuniteti i demokrateve në çdo territor ku ka më shumë se asnjëherë njerëz që duan të na bashkohen.” Hapja kapilare e Partisë Socialiste filloi duke afruar në kabinet qeveritar, ish deputeten e Lëvizjes Socialiste për Integrim, Silva Cakën, e cila u emërua zëvendësministre e punëve të brendshme. Aktualisht ajo përfaqëson partinë e drejtuar nga Ilir Meta, si këshilltare në bashkinë e Tiranës. Silva Caka zëvendësoi në detyrë Andi Mahilën, i cili shënoi rastin e parë në histori kur një zyrtar shkarkohet nga detyra për shkak të konsumit të një cigareje në ambjent të mbyllur. Ndryshimet e tjera në kabinet qeveritar kanë qënë më pak surprizuese. Ish deputetja e Partisë Socialiste, Edona Bilali, u emërua zëvendësministre e shëndetësisë, ndërkohë Eugena Tomini u rikthye në detyrën e zëvendësministres së Shëndetësisë.