Përmes një mesazhi të gjatë të publikuar në rrjetet sociale, Kryeministri Edi Rama i uron mirë se ardhjen Sekretarit të Shtetit, Antony Blinken, duke premtuar se Shqipëria do të vijojë të mbetet një faktor stabiliteti në rajon e më gjerë, si edhe e palëkundur në aleancën e saj me Shtetet e Bashkuara të Amerikës. Sekretari Blinken në Tiranë do të gjejë një vend aleat të angazhuar për paqen, stabilitetin demokratik dhe bashkëpunimin e gjithanshëm në këtë rajon. Shqipëria i ka shtrirë dorën e miqësisë të gjithë fqinjëve të rajonit dhe mbështet pa asnjë rezervë përpjekjet e Bashkimit Europian e të Shteteve të Bashkuara për normalizimin e marrëdhënieve midis Kosovës dhe Serbisë, si një çelës i padiskutueshëm strategjik për sigurinë, zhvillimin dhe mirëqënien e bashkësisë së popujve tanë në zemër të Europës, ku e shkuara e mbushur me tragjedi, konflikte e prapambetje, duhet t’ia lerë njëherë e mirë vendin të ardhmes së mbushur me mundësi, partneritete e progres.