Pas inspektimeve në Shkodër me kryebashkiakun Benet Beci dhe drejtuesen politike të Partisë Socialiste për këtë qark, kryeministri Edi Rama është takuar edhe me strukturat e socialistëve. Gjatë takimit në Shkodër, Rama e drejtoi fokusin tek rienergjizimi i Partisë Socialiste, proces në të cilin janë përfshirë të gjitha strukturat në të gjithë vendin. Rama është ndalur tek nevoja e anëtarësimeve të reja dhe afrimi i të rinjve rreth kësaj force politike, duke lënë kështu pas ndasitë e së shkuarës. Rama: “Duhet të jemi më gjithëpërfshirës në Shkodër, të hapim dyert për të gjithë edhe për demokratët që në Shkodër kemi Benetin kështu që demokratët e kanë derën e hapur. Po komunikojmë në vazhdën e energjizimit të PS për të mirëpritur anëtarë dhe anëtare të reja të PS-së. Dua të them që pas 24 orësh në Shkodër më vjen shumë mirë që rrugëtimi është pozitiv dhe ndjesia e vlerës së votës është e prekshme. Besoj që është e prekshme jo vetëm për mua, por edhe për banorët e Shkodrës.” Kreu i qeverisë thekoi se Shkodra do të ketë mbështetje të madhe dhe pa kursim, pasi sipas tij është një nga bashkitë më të prapambetura në vend.