British Airëays pezulloi fluturimet për në dhe nga Izraeli, pasi ekuipazhi i një avioni të saj u prek nga sulmi me raketa balistike në aeroportin e Tel Avivit. Linja ajrore anuloi shërbimet përkohësisht, pasi Huthët e mbështetur nga Irani lëshuan një raketë balistike nga Jemeni në aeroportin Ben Gurion të dielën, duke plagosur gjashtë persona. Ekuipazhi që qëndronte në Tel Aviv në mesin e fluturimeve u transportua më vonë me një avion të posacëm në Vjenë të Austrisë. "Jemi të gjithë të lumtur që jemi larguar prej andej", tha një stjuardesë. Vetë kompania tha në një deklaratë për shtyp: Siguria e klientëve dhe ekuipazhit tonë është gjithmonë përparësia jonë. Ne monitorojmë vazhdimisht kushtet e operimit dhe kemi marrë vendimin për të pezulluar të gjitha fluturimet tona për në dhe nga Tel Avivi, të paktën deri të mërkurën, më 7 maj. U kërkojmë falje klientëve tanë për shqetësimin". Kompania ajrore kishte ndaluar fluturimet mes Tel Avivit dhe Londrës tetorin e kaluar, dhe i rinisi më 5 prill. Ministria e Jashtme britanike tha ndërkohë se i takonte linjave ajrore individuale të garantonin sigurinë e fluturimeve.