Në fund të nëntorit 2022 forcat speciale ukrainase arrestuan një agjent rus në kufirin me Hungarinë. Ky person kishte informacione sekrete që do të dërgoheshin në Hungari të memorizuara në një "USB" e të fshehur në trupin e tij. Aty kishte informacione të vjedhura personale për drejtuesit dhe personelin e shërbimit informativ ukrainas, SBU dhe shërbimin ushtarak, GRU si edhe informacione sekrete për baza ushtarake, armë dhe logjistikën e ushtrisë ukrainase. Siç u mësua më vonë, ky spiun do t'i dorëzonte këto informacione tek ambasada ruse në Budapest. Është raportuar prej kohësh për aktivitetet ruse të spiunazhit në Hungari dhe ekziston frika se Budapesti mund të kthehet në një kryeqendër të spiunazhit të Rusisë në BE. Kjo edhe pasi në kryeqytetin hungarez, aktualisht ka 50 diplomatë rusë të akredituar, nëdrsa në Pragë, Bratislavë dhe Varshavë së bashku janë jo më shumë se 20 të tillë. Shumë agjentë punojnë të maskuar si diplomatë, pasi gëzojnë imunitet dhe nuk lejohet të përndiqen nga autoritetet e vendit mikpritës. Krahas punonjësve të ambasadës ruse imunitet gëzojnë edhe punonjësit e një banke investimesh të themeluar në kohët sovjetike, IIB në Hungari. Qendra e bankës u zhvendos para tre vitesh nga Moska në Budapest dhe aty nuk ka frikë as nga hetimet, as gjykimi e as nga mbikqyrja financiare e autoriteteve hungareze. Që në njoftimin për shpërnguljen e bankës, opozita hungareze shprehu dyshim se në Budapest po bëhet zgjerimi i rrjetit të KGB-së. Dhe një nga shkaqet e këtyre dyshimeve është edhe fakti se kreu i Bankës është Nikolai Kosov, që rrjedh nga një familje spiunësh. Babai i tij ka qenë dikur spiun i KGB-së në Budapest, nëna e tij është vlerësuar nga agjencia ruse TASS "një nga spiunet më të veçanta të shekullit të 20-të".Pas sulmit të Rusisë kundër Ukrainës, shtetet e NATO-s, anëtare tek banka IIB, Bullgaria, Rumania, Çekia dhe Sllovakia u tërhoqën. Hungaria qëndroi. Përveç kësaj që nga fillimi i agresionit rus, të gjitha shtetet e BE janë të gatshme të dëbojnë spiunët rusë të maskuar si diplomatë. Hungaria jo.