Presidenti amerikan Donald Trump, tha se Moska dhe Kievi duan të zgjidhin luftën në Ukrainë dhe se Presidenti rus Vladimir Putin ishte më i prirur drejt paqes pas rënies së fundit të çmimit të naftës. "Mendoj se me çmimin e naftës që ekziston tani, nafta ka rënë, ne jemi në një pozicion të mirë për të zgjidhur krizën, ata duan ta zgjidhin. Ukraina dëshiron ta zgjidhë," u tha Trump gazetarëve në Zyrën Ovale. Çmimi i naftës, i cili nxit ekonominë ruse, ka rënë me rreth 15 dollarë për fuçi që nga fillimi i vitit. "Kemi bërë një rrugë të gjatë dhe mund të ndodhë diçka", tha Trump. Ai vuri në dukje ndërkohë se Putin kishte propozuar një armëpushim tre-ditor për të shënuar 80-vjetorin e fitores së Bashkimit Sovjetik dhe aleatëve të tij mbi Gjermaninë naziste në Luftën e Dytë Botërore. "Siç e dini, Presidenti Putin sapo njoftoi një armëpushim tre-ditor - i cili nuk duket shumë, por është shumë", tha Trump. "Kjo është një luftë që nuk duhet të ndodhte kurrë". Trump tha se numri i të vrarëve në luftë ishte shumë më i lartë se sa raportohet nga shumica e organizatave mediatike. Kremlini, i pyetur të hënën në lidhje me një takim të mundshëm mes Trumpit dhe Putinit në Arabinë Saudite, tha se një takim ishte i nevojshëm, por se Putin nuk kishte planifikuar udhëtime në Lindjen e Mesme për mesin e majit. Trump ka thënë se planifikon të vizitojë Arabinë Saudite në maj.