Një ofertë e papritur nga presidenti amerikan, Donald Trump, për t’iu bashkuar bisedimeve mes Ukrainës dhe Rusisë, që pritet të zhvillohen këtë javë në Stamboll, ka nxitur biseda mes diplomatëve amerikanë dhe evropianë, të cilët vazhdojnë të kërkojnë një rrugë për t’i dhënë fund luftës në Ukrainë. “Mos e nënvlerësoni të enjten, në Turqi”, tha Trump për gazetarët në Shtëpinë e Bardhë, para nisjes për në Arabinë Saudite, Emiratet e Bashkuara Arabe dhe Katar, duke iu referuar bisedimeve të mundshme më 15 maj. “Po mendoj të shkoj atje. Nuk e di ku do të jem të enjten”, tha Trump. “Kam aq shumë takime… Ndoshta do të jem atje, nëse e shoh që mund të ndodhë diçka”. Sekretari amerikan i Shtetit, Marco Rubio, zhvilloi më vonë, një bisedë telefonike me ministrat e Jashtëm të Francës, Gjermanisë, Polonisë, Britanisë, Ukrainës dhe me shefen e politikës së jashtme të BE-së, Kaja Kallas, njoftoi Departamenti amerikan i Shtetit, përmes zëdhënëses Tammy Bruce. “Udhëheqësit diskutuan për hapat e mëtejshëm drejt një armëpushimi dhe rrugës për paqe në Ukrainë”, tha Bruce. Aleatët e Ukrainës, më herët, ishin skeptikë për mundësinë e bisedimeve dhe për sinqeritetin e presidentit rus, Vladimir Putin. “Nuk mund të ketë bisedime nën zjarr, nëse nuk ka armëpushim”, tha Kallas gjatë një takimi për Ukrainën në Londër. “Duam të shohim që edhe Rusia dëshiron paqen. Duhet që të dyja palët ta duan paqen; për luftë mjafton vetëm një – dhe po shohim që Rusia e do luftën”. Presidenti ukrainas, Volodymyr Zelensky, tha më herët se është i gatshëm të takohet me Putinin në Stamboll. Nuk ka ende përgjigje nga Kremlini për ofertën e Zelenskyt, dhe Moska nuk ka komentuar as ofertën e Trumpit për të marrë pjesë në bisedime. Por ministria e jashtme ruse konfirmoi se ministri sergei lavrov ishte takuar me homologun e tij turk për të diskutuar për bisedimet e drejtpërdrejta me Kievin.