Presidenti i Rusisë, Vladimri Putin, do të presë homologun e tij turk, Recep Tayyip Erdogan, në Soçi më 4 shtator, njoftoi Kremlini. Takimi Putin-Erdogan vjen gjashtë javë pasi Moska u tërhoq nga marrëveshja për eksportin e drithërave ukrainase që Ankaraja dhe Kombet e Bashkuara e kishin ndërmjetësuar. Zëdhënësi i Kremlinit, Dmitry Peskov, njoftoi se dy liderët do të takohen, ndërsa pritet që ata të diskutojnë për marrëveshjen e drithërave, apo siç njihet edhe si nisma e drithërave e Detit të Zi. Kjo marrëveshje kishte mundësuar që të transportoheshin drithërat nga portet ukrainase në Detin e Zi për në Afrikë, Lindje të Mesme dhe Azi. Marrëveshja u arrit në korrik të vitit 2022 dhe mundësonte kalimin e sigurt të produkteve ushqimore ukrainase. Po të njëjtën kohë u arrit edhe një memorandum midis OKB-së dhe Rusisë, përmes së cilit palët u zotuan se do të tejkalonin pengesat me të cilat përballen dërgesat ushqimore ruse dhe plehrat artificiale.