Presidenti Vladimir Putin nuk do ta mbajë konferencën e tij të fundvitit me gazetarë këtë muaj, njoftoi Kremlini, 10 muaj pas nisjes së agresionit të Rusisë ndaj Ukrainës, që nuk po shkon siç priste Moska. Konferenca është një element kryesor i kalendarit të presidentit rus pasi i jep atij mundësinë të tregojë se i ka gjërat nën kontroll ndërsa ulet i vetëm në një skenë për një seancë pyetje-përgjigje me gazetarët që mund të zgjasë për më shumë se katër orë. Por lufta e cila filloi më 24 shkurt, nuk i ka shkuar mirë udhëheqësit rus. Forcat e tij u detyruan të tërhiqen nga kryeqyteti ukrainas Kiev në fillim të luftës dhe kanë pësuar humbje të mëdha në fushën e betejës në lindje dhe jug të Ukrainës. Zëdhënësi i Kremlinit Dmitry Peskov u pyet nga gazetarët nëse ishte caktuar një datë për “konferencën e madhe të shtypit” të këtij viti dhe u përgjigj: “Jo, nuk do të ketë një të tillë para vitit të ri”. Ai tha se Putin do të gjente mënyra të tjera për të komunikuar me gazetarët, duke vënë në dukje se ai kishte mbajtur konferenca të tjera shtypi, përfshirë gjatë udhëtimeve të tij jashtë vendit. Peskov tha ndërkohë se Kremlini do të caktojë më vonë një datë për fjalimin vjetor të presidentit Putin në të dy dhomat e parlamentit të Rusisë, i ngjashëm me fjalimin vjetor të presidentit të SHBA-së në Kongresin amerikan. Vladimir Putin gjithashtu organizon çdo vit një dalje televizive me anëtarët e publikut, të quajtur “Linja e drejtpërdrejtë me Vladimir Putinin”, e cila u mbajt për herë të fundit në qershor të vitit 2021.