Lufta e Ftohtë duket se nuk ka mbaruar kurrë. Të paktën kështu ndodh në sytë e presidentit rus, vladimir Putin. Treguesi më i qartë se kremlini e ka vazhduar pa ndalur luftën e tij kundër perëndimit, edhe pas rënies së bashkimit sovjetik, është aktiviteti i shërbimeve të sigurisë dhe inteligjencës ruse. Në operacionet e tyre dhe në fuqinë e madhe që zotërojnë në shoqërinë ruse, ata kanë vazhduar aty ku e la inteligjenca sovjetike. Që nga viti 1991, këto agjenci janë drejtuar nga një strategji revanshiste për ta bërë Rusinë përsëri të madhe dhe për të përmbysur rendin ndërkombëtar të udhëhequr nga SHBA-të pas Luftës së Ftohtë. Dikur KGB-ja arriti të depërtonte në shumë vende. Edhe sot Rusia ka një rrjet global spiunësh të aftë për të zbuluar sekrete nga shumë qeveri perëndimore. Presidenti rus madje ka rrëfyer, gjatë një interviste televizive në vitin 2017, se drejtonte një rrjet “ilegal” spiunësh jashtë vendit, ndërsa shërbente si oficer i KGB-së. Presidenti sqaroi se kishte punuar me agjentë të fshehtë, të cilët ishin aktivë pa mbrojtje diplomatike. Këta spiunë njihen si “të paligjshëm”, dhe sot janë më shumë se kurrë në veprim. Spiunët "e fjetur" rusë janë të vendosur në shumë vende në Evropë dhe Amerikë. Media britanike “The Guardian” ka shkruar se Moska ka filluar të përdorë “qelizat e fjetura” të vendosura në vendet perëndimore ose agjentët dhe operativët jozyrtarë, që mund të kenë shpenzuar edhe vite të tëra, pa bërë asnjë punë inteligjence. “Ilegalët” janë trashëgimia e një programi sovjetik, kujton gazeta britanike e cila citon disa episode si arrestimi, vitin e kaluar, i të paktën shtatë të dyshuarve për spiunazh në Norvegji, Brazil, Holandë, Slloveni dhe Greqi.