Pagat e punonjësve të administratës vendore do të unifikohen në 61 bashkitë e vendit. E thënë më thjesht, një ekonomist në bashkinë e Tiranës do të paguhet njësoj me kolegun e tij në bashkinë e Korçës. Ministri Arbian Mazniku, shpjegoi se nga viti 2025 do të ketë një rikonceptim të formulës së shpërndarjes së granteve për bashkitë, ku performanca do të jetë një element përcaktues. Mazniku: “Riklasifikuam nivelet e pagave, duke ndryshuar skemën. Nga një skemë e cila i ndante bashkitë në 5 grupime dhe në varësi të madhësisë së bashkive kishte edhe nivele të ndryshme pagash, në nivele pagash të unifikuar të të gjitha bashkive, pavarësisht madhësisë, duke dhënë mundësinë që një jurist, një arkitekt, ekonomistë etj merr një pagë të ngjashme në të gjitha bashkitë.” Orari i punës në administratë publike do të jetë fleksibël. Detajet e ndryshimeve ligjore i dha ministrja Adea Pirdeni e cila shpjegoi ndër të tjera edhe ndryshimet në kodin e punës që prek lejen vjetore të punonjësve.