Gazeta e njohur gjermane “Der Spiegel” i ka kushtuar një analizë të gjatë samitit të Ballkanit të Hapur në Beograd duke e cilësuar nismën si një përpjekje për bashkimin e rajonit përballë ndikimit të Rusisë. Ashtu si Ukraina, Serbia kërcënon të bëhet mollë sherri mes Rusisë dhe Perëndimit, shkruan gazeta, duke thekuar se Open Balkan është edhe një mjet për të mbajtur më pranë Beogradin. Sipas Der Spiegel, në këto kushte Kryeministri shqiptar Edi Rama po përpiqet të provojë një akt të vështirë balancues. Ai dëshiron të integrojë Ballkanin Perëndimor dhe të garantojë Kosovën si shtet të pavarur, por në të njëjtën kohë të shërojë dhimbjet fantazmë të Serbisë. Projekti “Ballkani i Hapur” e bashkon atë me “armikun e tij më të dashur Aleksandar Vuçiç”. Premtimi për lirinë e lëvizjes ndërmjet vendeve është një ndjesi e vogël, shkruan gazeta. Rama shpjegon se banorët në rajon ndahen në ata që kundërshtojnë Putinin dhe ata që e mbështesin atë. Kryeministri i thotë gazetës se beson se Rusia do të ishte e kënaqur nëse diçka do të lëvizte në drejtim të konfliktit në Ballkan”.