Tre persona mbetën të plagosur në një lokal në Llapnasellë të Graçanicës, për shkak të një konflikti të nisur prej shërbimit përtej kufizimeve të orarit që diktojnë masat anticovid. Sherri, nga sa shpjegoi policia e Kosovës, ka ndodhur mes disa klientëve dhe personelit të lokalit. “Mbrëmë rreth orës 22:00, është raportuar se në një restorant në Llapnasellë, ka pasur një mosmarrëveshje të momentit lidhur me shërbimin përtej kufizimeve të orarit në mes të disa personave dhe personelit të lokalit që për pasojë ka përfunduar në një zënkë mes tyre ku është përdorur edhe arma e zjarrit. Nga hetimi paraprak rezulton se të dyshuarit, të cilët ishin nën ndikimin e alkoolit, janë nxehur për shkak se i është refuzuar shërbimi nga ana e personelit sepse kishte kaluar orari i lejuar, e për pasojë njëri prej tyre ka shtënë me armë zjarri” , tha zëdhënësi policisë, Agron Borovci. Dy persona janë arrestuar deri tani në lidhje me ngjarjen, ndërsa dy të tjerë janë në arrati. Dy nga tre të plagosurit tashmë kanë dalë nga spitali, ndërsa një tjetër po vazhdon të marrë trajtim mjekësor.