Deri më tani, forcat ruse kanë përparuar ngadalë në veri dhe perëndim të Donetskut, drejt qytetit të Pokrovskut, dhe kohët e fundit kanë mbyllur një zonë ukrainase përgjatë vijës së frontit në jugperëndim të Toretskut, sipas ekspertëve në ISW. Përparimi rus drejt Pokrovskut është ndryshimi më i dukshëm në kontrollin e vijës së frontit pranë Donetskut prej disa muajsh, por analistët thonë se taktikat inovative nga forcat ukrainase, duke kombinuar përdorimin e dronëve dhe forcave tokësore, kanë shkaktuar humbje të konsiderueshme trupash dhe pajisjesh dhe kanë ngadalësuar ofensivën. Trupave ruse u është dashur një vit për të përparuar rreth 40 km (25 milje). Ukraina u detyrua të tërhiqej nga Avdiivka, pak në veri të Donetskut, në shkurt të vitit 2024 pas muajsh luftimesh. Përveç operacionit të saj në frontin lindor, Rusia filloi atë që ISW e përshkruan si "përpjekjen e saj kryesore vartëse" kur kaloi kufirin ndërkombëtar në veri të qytetit të dytë më të madh të Ukrainës, Kharkiv, në maj 2024. Disa fshatra u pushtuan dhe mijëra civilë ikën. Shtytja ruse ndodhi në fund të një periudhe katërmujore kur SHBA-të nuk po furnizonin me armë Ukrainën, për shkak të një ngërçi në Kongresin e SHBA-së, i cili u zgjidh në prill 2024.