Policia përdori sërish gazin lotsjellës mbrëmjen e të mërkurës në Beograd për të shpërndarë demonstruesit që protestojnë kundër mënyrës se si u trajtua pandemia e COVID-19-tës nga presidenti serb. Disa persona janë plagosur gjatë përleshjeve të mërkurën para parlamentit serb, përfshirë edhe disa nga udhëheqësit e opozitës. Përleshjet e mbrëmshme pasuan trazirat e një nate me parë që erdhën pas paralajmërimeve për rivendosjen e masave kufizuese të lëvizjes gjatë fundjavës për shkak të përkeqësimit të situatës me pandeminë. Grupe të të drejtave të njeriut denoncuan brutalitetin e policisë, ndërsa autoritetet thanë së policia veproi vetëm kur ishte e domosdoshme. Përleshje të mërkurën pati edhe në Novi Sad ndërsa protesta edhe në Nish e Kragujevc. Më herët gjatë të mërkurës presidenti i Serbisë u tërhoq nga vendimi i tij, për rivendosjen e ndalimit të lëvizjes në kryeqytet gjatë fundjavës. Në një konferencë me gazetarë ai tha se se shërbime të fshehta të huaja qëndrojnë pas protestave ndërsa protestuesit i cilësoi si "mbështetës të krahut të djathtë dhe profashist". Ai nuk i identifikoi shërbimet sekrete të huaja, të pretenduara, por sipas tij, nuk përjashtohet mundësia që trazirat të jenë përpjekje për të dobësuar pozicionin e Serbisë në prag të rifillimit të bisedimeve me Kosovën.