Një shtetas nigerian, i shpallur në kërkim nga drejtësia shqiptare para pesë vitesh ngriti në vendin tonë një skemë mashtrimi kompjuterik, pre e së cilës mund të kenë rënë disa biznese. Prokuroria e Tiranës ka kërkuar dënimin me 10 vite burg të nigerianit, Sebastian Viktor Negbenedor, pasi ka provuar se përmes mashtrimit me mesazhet elektronike i ka marrë një biznesi shqiptar 25 mijë euro. Denoncimi është bërë disa vite më parë nga administratori i një biznesi detergjentësh me zyra në zonën e Saukut në Tiranë. Sipas denoncimit, administratori thotë se prej vitesh komunikonte me një adresë emaili me palën italiane, ku bënte porosinë dhe pasi merrte mallin u dërgonte transferten nëpërmjet bankës. Në një nga këto mesazhe, pala italiane i kërkon që pagesën ta kryente te një llogari tjetër, jo në Itali, por në Gjermani.