Zbarkimi i oficerëve të Byrosë Kombëtare të Hetimit në banesat në pronësi të ish- bashkëshortes dhe partneres aktuale të Arben Ahmetajt heq çdo dyshim të mbetur se dy prokurorët e SPAK, Eneid Nakuçi dhe Klodian Braho kanë mbrojtur ish-ministrin gjatë hetimeve të dosjes së inceneratorit të Elbasanit. Urdhri për bastisje në vilën F022 në Hamallaj, në pronësi të Erjola Hoxhës, partnerja aktuale e Arben Ahmetajt dhe asaj në pronësi të Albina Mançkës, ish-bashkëshortja e Ahmetajt është dhënë nga dy prokurorët e SPAK, Altin Dumani dhe Enkeleda Millonai. Vendimi nuk është bazuar në një dosje të re hetimore të hapur ndaj Ahmetajt, por në bazë të dosjes 277 fraksion 1, që është akti i parë i ndarjes së dosjes së inceneratorit të Elbasanit nga dy prokurorët Braho e Nakuçi. Provat e faturave që Klodian Zoto ka paguar ndër vite për pushimet e Arben Ahmetajt nëpër hotelet luksoze të Europës dhe mesazhi që tregon se Zoto është porositësi real i vilës ku SPAK ushtroi kontrolle kanë qenë edhe në duart e dy prokurorëve Nakuçi e Braho.