Në Agjencinë e Prokurimeve Publike është publikuar këtë të mërkurë një procedurë tenderimi me nismë të Agjencisë Kombëtare të Planifikimit të Territorit. Në këtë procedurë, AKPT kërkon projekt-ide për zhvillimin e disa pronave shtetërore në kryeqytet, ku sipas planit fillestar, shteti do të vendosë në dispozicion truallin, ndërsa investitorët në këmbim do të ndërtojnë për institucionet zyra. Dokumentacioni shoqërues i hapjes së procedurës thotë se ‘një element kyç i këtij modeli bashkëpunimi është mbështetja tek një “fitore e ndërsjellët”. Në këmbim të së drejtës për të zhvilluar këto prona, që e jep shteti, partneri privat do të mbulojë kostot e zhvillimit të zyrave dhe ambienteve të reja të administratës publike për të plotësuar nevojat e institucioneve publike. Në këtë proces do të jetë e përfshirë edhe Korporata e Investimeve e cila do të luajë rolin e ndërmjetësit.