Në pritje të fillimit të procesit të vaksinimit, ministrja e Shëndetësisë Ogerta Manastirliu nga Durrësi ripërsëriti faktin se të parët do të vaksinohen grupet e riskut dhe ata që janë në vijën e parë të luftës anti covid. Pas marrëveshjes së qeverisë shqiptare të arritur me kompaninë amerikane Pfizer për 500 mijë doza, vaksinat e para priten të mbërrijnë në vendin tonë javën e tretë të janarit. “Ajo çka pritet tani është fillimi i vaksinimit dhe ne e kemi thënë do të fillojmë me ata të cilët janë në vijën e parë të kësaj lufte, me mjekët, me infermierët në spitalet COVID, me punonjësit e urgjencave, të cilët janë në frontin e parë dhe po vijojnë këtë betejë me këtë armik të padukshëm”, Në spitalin e Durrësit që ka edhe një pavion të dedikuar për trajtimin të sëmurve me covid, kanë mbërritur edhe disa prej autoambulacave të reja që iu shtuan shërbimit të Urgjencës Kombëtare. "Me flotën e 36 autoambulancave ne kemi vendosur që të rrisim kapacitetet e Tiranës, gjithashtu edhe të spitaleve rajonale dhe bashkiake. Spitali i parë ku shpërndahet flota është spitali i Durrësit, paralelisht do të vijojmë me spitalet e tjera rajonale, nga Kukësi deri në Sarandë, ku me këto autoambulanca, të cilat kanë të njëjtin standard, jo vetëm do të rrisim kapacitetet, por edhe rinovojmë kapacitetet aty ku kemi patur pika të dobëta. Në këtë situatë, spitalet rajonale po bëjnë përpjekje maksimale, qoftë për shërbimet e triazhit që kanë filluar që në momentin e parë por edhe ato sipas protokolleve dhe udhëzuesve të rasteve që kërkojnë një trajtim postcovid dhe që kërkojnë një mbështetje respiratore. Këto raste janë trajtuar dhe vijojnë të trajtohen në spitalet rajonale. Spitali i Durrësit ka një pavion të dedikuar për këto raste dhe jemi bërë gati që në rastet e një skenari ku do duhet që të dedikohen edhe për rastet covid, ne jemi gati me stafet e trajnuara, me aparaturat jetëshpëtuese, me të gjithë setin e elementëve që kanë nevojë, qoftë barna, materiale mjekësore” 36 autoambulanca të reja, të pajisura me të gjithë pajisjet e ndihnës së shpejtë, investim i qeverisë shqiptare po plotësojnë flotën anticovid në të gjithë territorin. më qëllim përballimin e çdo skenari të mundshëm nga pandemia.