Një gjykatë në Korenë e Jugut lëshoi të martën urdhër për arrestimin e presidentit të vendit, Yoon Suk Yeol, dhe për kryerjen e kontrolleve në rezidencën dhe zyrën e tij, nën dyshimet për kryengritje në lidhje me shpalljen jetëshkurtër të ligjit ushtarak. Kjo është hera e parë që lëshohet një fletarresti për një president në detyrë në Korenë e Jugut. Megjithatë, ekspertët thonë se ka pak gjasa për arrestim apo bastisje, nëse presidenti nuk shkarkohet nga detyra fillimisht. Gjykata e Qarkut në Seul dha urdhrin për arrestimin e Yoon Suk Yeol dhe për bastisjen e zyrës presidenciale dhe rezidencës së tij në qendër të Seulit, sipas një komunikate nga Zyra për Hetimin e Korrupsionit për Zyrtarët e Lartë, e cila po e udhëheq hetimin bashkë me policinë dhe autoritetet ushtarake. Ajo thotë se po kryen hetim për të parë nëse shpallja e ligjit ushtarak nga Presidenti, më 3 dhjetor përbën kryengritje.