Polonia do të vendosë kontrolle të përkohshme përgjatë kufijve me Gjermaninë dhe Lituaninë më 7 korrik, tha të martën kryeministri Donald Tusk, duke ndjekur shembullin e disa vendeve të tjera të Bashkimit Evropian në rivendosjen e kontrolleve kufitare për të ndaluar migrimin e paligjshëm. Qeveria liberale e Tusk është akuzuar nga partitë nacionaliste të opozitës se pranon shumë emigrantë të paligjshëm që kthehen nga Gjermania. Qeveria ka argumentuar se numri i tyre është i kufizuar. Debati mbi migrimin në Poloni është bërë gjithnjë e më i nxehtë javët e fundit, me aktivistët e ekstremit të djathtë që kanë filluar të organizojnë patrullime përgjatë kufirit me Gjermaninë. "Ne e konsiderojmë rivendosjen e përkohshme të kontrolleve, të nevojshme për të zvogëluar në minimum flukset e pakontrolluara të emigrantëve përtej kufirit polako-gjerman," tha Tusk në një takim qeveritar. Gjermania tha në shkurt se po i zgjaste kontrollet e saj të përkohshme kufitare për gjashtë muaj. Polonia është përballur me atë që e quan një krizë migrantësh të orkestruar nga Bjellorusia dhe Rusia në kufirin e saj lindor që nga viti 2021. Të dy vendet mohojnë se kanë inkurajuar migrantët të kalojnë kufirin.