Këshilli Ekonomik Kombëtar zhvilloi mbledhjen e tij të dytë për këtë vit, nën drejtimin e kryeministrit Edi Rama, njëherësh edhe kryetar i këtij këshilli, ku u diskutua mbi politikat në mbështetje të bizneseve. Në fjalën e tij, Rama u ndal në projektligjin për Dhomën Ekonomike Kombëtare, të cilin e konsideroi të vonuar por të domosdoshëm. Rama: “Një projektligj i vonuar për shumë vite pa i hequr askujt të drejtën që të bëjë çfarë organizimi të dojë në punën e tij, duhet të imponojmë detyrimin e regjistrimit në Dhomën Ekonomike Kombëtare siç e kanë të gjithë vendet demokratike për hir të së vërtetës, asgjë më shumë, por edhe asgjë më pak. Kur në ndërkohë nevojat e sipërmarrjes sot janë shumë të ndryshme nga ato që ishin më parë.” Rama nënvizoi ne në procesin e integrimit të Shqipërisë në Bashkimin Europian sektori publik e privat ka përgjegjësitë e veta.