Policia nuk gjobit vetëm ata që kapen pa maska në rrugë në zbatim të aktit normative të qeverisë, por edhe ata që duhet të zbatojnë karantinën. Në harkun kohor të 24 orëve të fundit, Policia ka gjobitur me 30 mijë lekë të vjetra 571 qytetarë që u kapën pa maskat mbrojtëse dhe 5 të tjerë me nga 7 milionë lekë, që kishin thyer karantinën. Nga gjobat për mosmbajtje mase janë konstatuar edhe 18 persona, që ishin në lëvizje pas orës 22.00, kur edhe ndalohet qarkullimi. Strukturat e Policisë, krahas përmbushjes së detyrave funksionale për parandalimin, evidentimin dhe goditjen e paligjshmërisë, kanë vijuar kontrollet në terren në të gjithë vendin, për të monitoruar zbatimin e masës së re për parandalimin e përhapjes së COVID-19, mbajtjen e detyrueshme të maskës mbrojtëse, e cila është detyrim për të gjithë qytetarët, që në momentin që dalin nga shtëpia. Gjatë kontrolleve janë shoqëruar në ambientet e Policisë në të gjithë vendin, 6 shtetas që nuk kanë pranuar t’i tregojnë punonjësve të Policisë dokumentin e identifikimit, të cilët pasi kanë paraqitur dokumentin e identifikimit, janë ndëshkuar me masën administrative 3.000 lekë dhe më pas janë lënë të lirë. Policia e Shtetit, krahas punës për parandalimin, evidentimin dhe goditjen e paligjshmërisë, sigurimin e rendit dhe qetësisë publike, do të vijojnë punën për monitorimin e zbatimit të masave anticovid në të gjithë vendin.