Presidenti kilian Gabriel Boric bëri histori javën e kaluar duke u bërë lideri i parë i Amerikës Latine që vizitoi Polin e Jugut, duke ndezur diskutime të reja globale rreth sovranitetit dhe eksplorimit shkencor në Antarktidë. Kjo e fundit, ka qenë prej kohësh subjekt i interesit gjeopolitik dhe shtatë vende kanë pretendime territoriale në kontinent: Kili, Argjentina, Mbretëria e Bashkuar, Norvegjia, Australia, Zelanda e Re dhe Franca. Megjithatë, këto pretendime shpesh mbivendosen dhe kanë një njohje të kufizuar sipas ligjit ndërkombëtar. Shtetet e Bashkuara dhe shumica e vendeve të tjera nuk i njohin zyrtarisht pretendimet territoriale në Antarktidë. Më 2 janar, Boriç mbërriti në Antarktidë për një udhëtim dy-ditor të quajtur Operacioni Polar Star III. Programi i presidentit kilian përfshinte vizita në Stacionin e Polit Jugor Amundsen-Scott dhe objektet kërkimore të Kilit në kontinent. Qeveria kiliane tha në një njoftim për shtyp se delegacioni përfshinte autoritete civile dhe ushtarake, si dhe shkencëtarë. "Ky është një moment historik për ne," tha Boriç gjatë një fjalimi televiziv. Megjithëse bota është përqendruar në Polin e Veriut, vecanërisht pas komenteve të presidentit të zgjedhur të SHBA-së, Donald Trump, për burimet e Grenlandës dhe Arktikut, udhëtimi i Boriçit ka hedhur dritë tashmë edhe në rajonin polar jugor.