Socialistët rrëzuan kërkesën e Partisë Demokratike për përjashtimin e kreu të grupit parlamentar të PS, Taulant Balla me pretendimin se ai ofendoi deputetët e opozitës me fjalën ‘zagar’ gjatë seancës që u mbajt të enjten e javës së kaluar. PS arsyetoi te Etika se gjuha e përdorur nga Taulant Balla nuk i drejtohej ndonjë deputeti me emër konkret, por është përdorur si metaforë gjatë diskutimeve dhe përplasjeve mes dy palëve për votimin e Avokatit të Popullit. Partia Demokratike kërkoi përjashtimin e Ballës nga çdo aktivitet parlamentar për 30 ditë. Kjo kërkesë e opozitës u depozitua duke cituar frazën e kreut të grupit të PS, që në seancën e së enjtes iu drejtua opozitës duke i thënë se ‘po folët për lepuj, duhet të flisni edhe për zagarët, se lepurin në pritë e sjell zagari’. Kjo frazë e Ballës mori shkas sulmet e PD ndaj Endri Shabanit, që edhe pse kishte firmosur në mbështetje të kandidaturës së tij për Avokat Populli e tërhoqi mbështetjen duke e quajtur madje edhe ‘Lepur Surreli’.