Kryetari i Bashkisë së Rrogozhinës, Edison Memolla reagoi publikisht pas hetimeve të Prokurorisë së Posaçme, për ku dyshohet se ka dhënë dëmshpërblim për banesat e dëmtuara nga tërmeti, ku mes të dëmshpërblyeve janë njerëz të tij të afërt. Një ditë më parë, u raportua gjithashtu se në adresë të tij po hetohet një transfertë e dyshimtë prej 1 milionë Eurosh. Facebook Memolla: “Deri më sot jam përballur me çdo akuzë, shpifje, të pavërtetë apo lajm të rremë që prej kohesh kanë dalë për të ulur në sytë e gjithkujt imazhin tim. Të qenurit pjesë e politikës padyshim që të bën të jesh në shënjestër të shumë kazanëve mediatik vetëm për të përmbushur kërkesat e personave të etur për pushtet që fshihen pas siglave televizive. Megjithatë kurrë nuk kam dalë kundër tyre hapur pasi jam individ që di ti përgjigjem drejtësisë për aq kohë sa punën dhe postin që ma kanë besuar qytetarët e mi e drejtoj me ndershmëri dhe pastërti. Por fakti që përveç meje po baltosni familjarë të mi me akuza tepër të rënda dhe të pafalshme, madje për të disatën herë, më bën të reagoj dhe të përdor çdo armë të mundshme ligjore për t'i mbrojtur ata.” – shprehet kryetari i bashkisë së Rrogozhinës, në Facebook. Memolla e mbyll reagimin e tij duke paralajmëruar se për çdo akuzë të pabazuar ndaj tij, do të ndjekë rrugën ligjore në institucionet e drejtësisë.