Një 24-vjeçar është arrestuar nga policia e Tiranës pasi i vodhi, me dhunë një shumë parash, një taksisti me të cilin po udhëtonte. Si rezultat i ndjekjes së menjëhershme, në rrugën “Sandër Prosi”, është kapur nga shërbimet e Sektorit të Forcës së Posaçme “Shqiponja”, shtetasi Geri Metaj, 24 vjeç, banues në Durrës. Metaj, orët e para të ditës së mërkurë, kishte hipur në një taksi në rrugën “Ibrahim Rugova”, dhe gjatë udhëtimit, kishte goditur me mjet prerës shoferin e taksisë, shtetasin M. K., 57 vjeç, duke i vjedhur atij një shumë parash, dhe më pas është larguar. Si pasojë 57-vjeçari është lënduar dhe ndodhet në spital, nën kujdesin e mjekëve. Pas angazhimit të policisë, u bë i mundur arrestimi i Metajt, dhe materialet i kanë kaluar tani prokurorisë së Tiranës për veprime të mëtejshme procedurale.