Uniformat blu të Durrësit kanë vënë në pranga falë opëracionit policor ‘Latitant’, një shtetas të shpallur në kërkim ndërkombëtar, për llogari të Italisë. Policia e Durrësit njofton se në bazë të informacioneve të siguruara nga inteligjenca policore dhe të shkëmbyera ndërmjet zyrave homologe të Interpolit, Sektori i Qarkullimit Rrugor, ka lokalizuar dhe arrestuar 32-vjeçarin me dy identitete Erjon Meshi alias Arjon Mema. Gjykata e Trentos i ka caktuar këtij shtetasi, masën e sigurisë "Arrest me burg", për veprat penale “Mbajtje e paligjshme, shitje, prodhim, shpërndarje dhe trafikim i lëndëve narkotike" dhe "Pjesëmarrja në grup kriminal, me qëllim trafikimin e lëndëve narkotike", parashikuar nga Kodi Penal i Italisë. Interpol Tirana dhe Interpol Roma po bashkëpunojnë për ekstradimin e këtij shtetasi, në Itali.