Aksidenti në Fier, që shënoi fillimisht dy bashkëshortë të plagosur ka marrë përmasa më të rënda, pasi një prej tyre humbi jetën. 67-vjeçari Ilirian Merdanaj gjeti vdekjen në spital, ndërsa bashkëshortja e tij, Gjinovefa Merdanaj është nisur drejt spitalit të Traumës në Tiranë për një mjekim më të specializuar për shkak të plagëve të rënda. Aksidenti ndodhi në Fier, ku burrë e grua ishin duke kaluar te vijat e bardha, kur u përplasën nga një automjet. Drejtuesi i makinës, 30-vjeçari me inicialet L.B., u ndalua menjëherë nga policia. Por, paraditja e kësaj të diele ka shënuar një tjetër aksident edhe në aksin Elbasan-Librazhd, ku për pasojë dy persona kanë mbetur të plagosur. Ngjarja ndodhi në Labinot Fushë rreth orës 08:45, ku në përplasje janë përfshirë një kamionçinë dhe dy autovetura dhe për pasojë mes tyre janë shkaktuar dëmtime të rënda. Paraprakisht dyshohet se aksidenti i trefishtë ka ndodhur për shkak të një parakalimi të gabuar të njërës prej autoveturave. Për disa minuta është bllokuar dhe qarkullimi, ndërsa policia ka dokumentuar provat në vendin e ngjarjes për të përcaktuar rrethanat dhe shkaqet që sollën këtë aksident. Fatmirësisht gjendja e të plagosurve është jashtë rrezikut për jetën.