Partia Socialiste kërkon përjashtimin me 20 ditë nga punimet parlamentare të Agron Shehajt, pas përplasjeve në seancës e fundit plenare ku kryetari i partisë ‘Mundësia’ ngriti zërin për banorët e Rrjollit që prej një muaji protestojnë kundër ndërtimit të një resorti në tokën që pretendojnë se është pronë e tyre. Shkresa është firmosur nga dhjetë deputetë të Partisë Socialiste dhe në të argumentohet se edhe pas përfundimit të minutazhit të fjalimit të tij, Agron Shehaj nuk u largua, por bllokoi foltoren. “Në shkelje te Rregullores së Kuvendit, deputeti Shehaj vijoi të përdorë fjalë fyese dhe kundërshtuese ndaj drejtueses së seancës dhe më pas të agresonte verbalisht deputetë të Grupit Parlamentar të PS.” - shprehen deputetët e shumicës parlamentare.