Një aksident me pasojë vdekjen është regjistruar në aksin rrugor Lushnje-Rrogozhinë. Një këmbësor i cili ishte duke ecur në anë të rrugës është përplasur nga një makinë që dyshohet se po lëvizte me shpejtësi të lartë. Viktima është identifikuar si Muhamet Fusha 70 vjeç. Drejtuesi i mjetit është larguar nga vendngjarja, teksa uniformat blu kanë nisur hetimin. Ngjarja ka ndodhur në orët e para të mëngjesit të së shtunës, ndërsa policia është lajmëruar nga kalimtarë të rastit. Fillimisht u dyshua për vrasje, pasi trupi i viktimës mund të ishte sjellë aty. Pas ekspertizës në vendngjarje dhe këqyrjes së shenjave në trup, policia konfirmon se 70-vjeçari është përplasur nga një automjet. Pas mbledhjes së provave materiale në vendin e ngjarjes, uniformat blu po kontrollojnë dhe kamerat e sigurisë përgjatë aksit rrugor, për të identifikuar mjetin dhe më pas të kapin autorin.