Dy nga tre shoferët e arrestuar për aksidentin me përplasjen e dyfishtë që i mori jetën një 40-vjeçari në Sukth të Durrësit janë kthyer në shtëpi. Gjykata e Durrësit vlerësoi këtë të enjte si të ligjshëm arrestimin e tre drejtuesve të automjeteve të përfshira në aksidentin me pasojë vdekjen, por dha masën e sigurisë “arrest me burg” vetëm për njërin prej tyre. Për dy drejtuesit e tjerë, u vendos masa e sigurisë “arrest në shtëpi”. Ngjarja e rëndë rrugore ndodhi të dielën e kaluar në aksin rrugor Sukth-Manëz, në Vadardhë, pranë Kthesës së Ariut, kur nje automjet tip Golf i drejtuar nga 24-vjeçari me inicialet A.H goditi nga pas një motoçikletë pa targa me të cilën po lëviznin dy banorë të zonës. Pas përplasjes 24-vjeçari, ndaj të cilit gjykata caktoi masën e sigurisë arrest me burg, u largua nga vendi i ngjarjes, duke i lënë të dy të dëmtuarit të shtrirë në rrugë. Disa sekonda më pas, një tjetër automjet tip Kady i drejtuar nga 66-vjeçari me inicialet H.H. i kalon sipër pasagjerit 40-vjeçar të motocikletës që dergjej në rrugë. Edhe ky mjet nuk ndalon për t’i dhënë ndihmën e parë të dëmtuarve.