Kur ish-kryeministri Nikolla Gruevski ishte në pushtet, në Maqedoni e Veriut gëlonte qendrimi anti-NATO, anti-perëndimor dhe anti-shqiptar. Largimi i tij dhe ardhja në pushtet e Zoran Zaevit duket se konfirmoi pozicionimin pro-perëndimor të Maqedonisë së Veriut, ndërsa tonet e maxhorancës ndaj shqiptarëve u zbutën edhe më tepër. Opozita e udhëhequr nga partia e drejtuar prej vitesh nga Gruevski, VMRO-DPMNE, tashmë nën drejtimin e Mickovskit po përpiqet të mbledhë 61 firma. Krah opozitës, janë radhitur edhe partia Besa, si edhe partia “ E majta”. Partia më e madhe shqiptare megjithatë, Bashkimi Demokratik për Integrim, me në krye Ali Ahmetin, vazhdon të qendrojë në krah të Zaev. Ajo që u kritikua shumë nga të gjithë, duke përfshirë edhe Kosovën, ishte qëndrimi i Arben Taravarit, kryetarit të komunës së Gostivarit, për të shkuar në koalicion me partinë e Majta, e cila mohon edhe pavarësinë e Kosovës.