Moti i keq me stuhi dhe reshje të dendura shiu ka shkaktuar përmbytje në zona të ndryshme në Greqi. Një nga zonat më të goditura prej stuhisë është ishilli Evias, që vetëm dy muaj më parë u përballë më situatën dramatike tëzjarreve masive që shkrumbuan me dhjetëra hektarë pyje. Sipas raportimeve që vijnë nga mediat e vendit fqinjë, stuhia e quajtur “Athina” ka shkaktuar dëme të shumta materiale, duke rrëzuar çatitë e shtëpive. Po ashtu dëmtime serioze kanë pësuar edhe disa akse rrugore pranë disa fshatrave bregdetare, pohuan zyrtarë lokalë për mediat shtetërore . “Dhjetëra shtëpi janë përmbytur; përrenjtë dolën nga shtrati edhe pse shiu zgjati vetëm disa, ndërsa ekipet e shpëtimit kanë punuar gjatë gjithë natës për të transportuar banorët në vende të sigurta. Kjo është shenjë se ky dimër ka për të qenë shumë i ashpër”, u shpreh Jorgos Tsapourniotis, kryetar I Bashkisë në Matundi. Ai ka bërë të ditur gjithashtu se si pasojë e stuhisë nuk ka pasur njerëz të lënduar apo të bllokuar në banesa. Autoritetet janë vënë në lëvizje për të bërë të mundur pastrimin e zonës, ndërsa deri më tani raportohet për më shumë se 200 shtëpi të përmbytura. Ishulli Evias u gjunjëzua javë më parë për shkak të zjarreve të shumta që përfshinë sipërfaqe me pyje, duke dëmtuar seriozisht edhe sezonin turistik që ishte në kulmin e vet. Me qindra turistë të ndodhur nën kërcënimin e flakëve, braktisën hotelet në ishull si dhe anuluan prentimet.